حابب تعرف كيف طعم الخرى؟

إسأل فلسطيني

هابي فالنطيز داي :)

بتتذكر لمن حكيتلي قرب عيد الحُب؟ 

مكنتش انا ناسيه, بس عملت حالي مش متذكره عشاني مش متعوده اذكر حالي باعياد الحب,

 عشاني عادة بقضيها لحالي.

بتعرف شو بوجع اكتر من معرفه إنو هاد كمان عيد رح اقضيه لحالي؟ كمان يوم رح اقضيه مسبات ع الرأسماليه والكونسومارزم وشو عاملات بعقول المغرمين؟ كمان فالنتاين مكعبله بالتخت بوضعية الجنين, بوكل شوكالاطه وببكي بصوت واطي عشاني منافقه بغار منهم 

بالسر؟

إنك وعدتني مقضيش هاد العيد لحالي زي كل عيد.

وعدتني بحُبك.

  

وانا إنغرمت فيك... 

غرام من النوع المبتذل, 

زي تبع أغاني التسعينات,

 زي تبع افلام ماثيو ماكونوهاي,

زي تبع البنات باعلانات معجون السنان,

حُب من اول كذبه.

+++

بتتذكر لمن تركتني بالضبط قبل عيد الحُب؟ 

وقتها قررت أنسى بـأي تاريخ إحنا وبأي تاريخ الفالنتاين الملعون هاد.

أنساه للأبد...

بس لأ!

"بكرا عيد الحب واكيد الاحباب بدهم يتصلوا فيك كتير, لتغيير نغمة الانتظار لأغنيه رومانسيه إتصل بـ..."

عنجد شكرا سلكوم, 

ما صدقت وأنا انسى...

وبما أنكم قررتوا تذكروني,

بكرا كمان عيد حُب رح البس فيه أسود,

واشتري فيه شوكولاطه ويمكن حتى بوظه من تبعت العلب,

ورح ع الاغلب احضر فيه فيلم بذكرني فيك,

والف حالي بلفحتك,

واتكعبل تحت اللحاف,

وأغنيلك...

"أند أأأأأأأأي, ويل أولوايز لاف يووووو...."

 وأعيّط,

منو ع حالتي المزريه, 

ومنو ع روح عمتنا ويتني هيوستون.

بعرفش...

*هذا النص كتب بلسان العاميه وقد يحتوي على عبارات "عيب" المهم إذا إنتو عندكم حساسيه من العربي المطبش تبع الشوارع, تقروش.

بعرفش ليش وأنا أدرس متأخر, بتجيني موجة الإكتاب هاي. إللي احياناً بتوصل لإنني امسك قلم وأبدا اكتب, حتى لو كتابات مراهقية هرمونية ساذجة.

بس إلي فتره مش هيك وضعي.

إلي فتره محوربه القلم والدفتر والكتاب والادب والشعر والمدونات حتى.

 إلي فتره مش شايفه إبتسامتي. أبصر وين نسيتها. 

يمكن بين باصات "ايجيد" وتاكسيات الطيبه-كفار سابا (نفسي أعرف شو إسم كفار سابا قبل الإحتلال, خلص بسأل ماما, أو جوجل, مَهُمّي التنين بنوك للمعلومات, مأفرقتش كثير يعني).

بعرفش ليش هيك بعمل بحالي, بدشر حالي أوقع عن الحفّه. بطلت تفرق معي إذا إلي مستقبل أو مليش, المهم هسّا.

بديش أنضغط, بديش أنضغط, بديش أنضغط.

بحب أنضغط, بحس إنّو عندي إشي أعملوا, بس الضغط والقلق والسجن إللي فارضته ع حالي بسمحليش أعمل إشي. دوره مغلقه يعني.

المشكله إني بعرف أخطط, وأفكر وأضيع بأفكاري. بس الحياه مش براسي, الحياه برّه, الحياه شغل.

الصعب بالحياه هو الشغل, وانا تربيت اتدلل, مش اشتغل. تربيت بعصر ال"خلي جوجل يقلك شو كان إسم كفار سابا, فش حاجه تفتح كتب"

بعرفش ليش بحب أشارك الناس همومي, أكون كتاب مفتوح, أخرتها بتيجي ع راسي هاي, بذكركم.

مهو إللي بكون تي.أم.أي (تو ماتش إنفورماشيون) آخرتو بقول منها أخ وأي.

شو الهدف من إني أكتب ع إني مش عارفه أكتب؟ فش هدف, حنّو طيازكم.

بعرفش وين هدى. إذا بتشوفوها قولولها إنها تبطل تتأخر ع مواعيدها, لَ يفوتها قطار الحياه.